Јапонските власти денеска потврдија дека има планови за изградба на автоматизиран товарен коридор меѓу Токио и Осака, кој јапонската влада го нарече „пат на подвижна лента“.
Овој начин на транспорт на товар треба да го компензира недоволниот број возачи на камиони, а анимацијата создадена од владата покажува големи контејнери на тркала кои се движат по коридор со три ленти долж автопатот Токио-Осака, пишува Japan Times.
Овој транспортен систем треба да започне со пробна работа кон крајот на 2027 или почетокот на 2028 година, а се планира да биде целосно оперативен до средината на 2030-тите.
Вчитувањето ќе биде автоматизирано и ќе се врши во координација со аеродромите, железничките и бродските терминали.
„Треба да бидеме иновативни во начинот на кој пристапуваме кон транспортот. Покрај компензирањето за недостигот на работна сила и потребата да се намали обемот на работа на возачите, системот ќе помогне и во намалувањето на емисиите на јаглерод диоксид“, рече Јури Ендо, службеник во јапонското Министерство за Земјиште, инфраструктура, транспорт и туризам.