Високото ниво на неформална економија и непријавено вработување останува меѓу најсериозните пречки за конкурентноста на македонските компании, се наведува во економските оценки на Европската комисија за 2026 година. Во информации објавени на 10 ноември се посочува дека, според одредени проценки, неформалната економија би можела да достигнува околу 38 отсто од бруто-домашниот производ.
Според статистичките податоци наведени во извештајот, неформалното вработување во вториот квартал од годинава изнесувало 14,5 отсто од вкупната вработеност. Европската комисија посочува дека високото учество на неформалниот сектор ја нарушува пазарната конкуренција и создава дополнителен притисок врз фирмите што ги исполнуваат даночните и другите законски обврски.
Во извештајот се укажува и на потребата од посилни структурни реформи, поголема продуктивност и одржлива фискална политика. Проценката за сивата економија и официјалната стапка на неформално вработување се два различни показатели и не треба да се поистоветуваат.
