Американските берзи ја завршија минатата недела со силен раст, при што индустрискиот индекс Dow Jones порасна за 1,3%, достигнувајќи 44.901 поен. Паралелно, S&P 500 скокна за 1,5% на рекордни 6.388 поени, додека Nasdaq се искачи за 1% на 21.108 поени, поттикнат од значаен пораст на акциите на технолошките компании.
Клучна улога во овие движења одиграа позитивните квартални резултати на Alphabet, матичната компанија на Google. Тоа придонесе за скок и кај други технолошки лидери како Nvidia, Microsoft и Amazon, со оглед на оптимизмот на инвеститорите дека и тие ќе прикажат силни резултати.
Според анализите, од околу 170 компании во индексот S&P 500 што досега објавиле финансиски извештаи, дури 82% ги надминале очекувањата. Просечната добивка за вториот квартал се проценува на раст од 7,7% во однос на лани.
Но позитивниот тренд не се однесува само на Волстрит. И глобалните берзи бележат значаен раст, при што MSCI индексот на светските берзи исто така достигна највисоко ниво досега.
Пазарниот оптимизам е поттикнат од новиот трговски договор меѓу САД и Јапонија, кој обезбедува континуирана и предвидлива економска соработка меѓу двете држави. Инвеститорите се надеваат дека Вашингтон ќе постигне сличен договор и со Европската Унија, пред да стапат на сила новите тарифи од 1 август.
Во обид да се спречи понатамошна ескалација на трговските тензии, американски и кинески претставници ќе се сретнат во Стокхолм следната недела, со цел продолжување на разговорите до 12 август.
Стабилизирањето на трговските односи и охрабрувачките деловни резултати продолжуваат да влијаат позитивно врз глобалниот пазар – барем засега.
НАЈЧИТАНО НА ИНТЕРНЕТ...