Цените на нафтата на светскиот пазар денеска паѓаат поради загриженоста дека високите цени на горивата би можеле да му наштетат на економскиот раст.
Во Лондон цената на суровата нафта од типот Брент од Северното Море беше пониска за 75 центи и сега изнесува 108,36 долари за барел.
Во Њујорк цената на лесната сурова нафта падна за 1,42 долари на 108,17 долари за барел.
– Падот на акциите предводен од малопродажниот сектор во САД ја зголемува загриженоста за економскиот раст, а со тоа и за побарувачката на гориво – изјави пазарниот аналитичар од банката „Саксо“ Оле Хансен.
Голем пад е регистриран на европските и азиските берзи, кои го следеа најтешкиот ден на Волстрит од средината на 2020 година, поради предупредувањата од најголемите компании во малопродажниот сектор за последиците од високата инфлација.