Бектеши: Забрана за извоз на одделни житарици и сончогледово масло за заштита на домашниот пазар и граѓаните

Министерот за економија Крешник Бектеши денеска ја образложи одлуката за ограничување на извозот на одделни стоки за заштита на домашниот пазар и граѓаните, заедно со Трајан Димковски, државен советник во Министерството за земјоделство, шумарство и водостопанство.

„На предлог на Министерството за економија и на барање на Министерството за земјоделство, шумарство и водостопанство, Владата на седницата одржана вчера донесе одлука за ограничување на извозот на одделни стоки со цел се избегнат шпекулативни дејствија на трговците и производителите и за заштита на домашното производство, домашниот пазар и граѓаните“, истакна Бектеши.

Согласно одлуката од денеска 11 март, па до 20 март, односно во времетраење од 10 дена забранет е извоз на следните производи:

-пченица и наполица,
-јачмен,
-пченка,
-брашно од пченица и наполица,
-семе од сончоглед,
-масла од семе од сончоглед.

„Имајќи ја предвид инвазијата на Русија во Украина и реперкусиите коишто оваа ситуација ги има не само на европските, туку и на светските пазари можам да кажам дека сега живееме во една од најголемите светски економски кризи. Како резултат на очекувањата за настанување на сериозни нарушувања поради недостиг на стоки кои се неопходно потребни за производството, преработката и за животот и здравјето на граѓаните, Министерството за економија согласно Законот за трговија ѝ предложи на Владата да се изврши ограничување на извозот на одделни производи, што, како што и претходно кажав, е на барање на Министерството за земјоделство. Владата ја носи оваа одлука за ограничување на извозот превентивно, за да не настанат поголеми нарушувања на пазарот поради одлуките за ограничување/забрана за извоз на останатите земји од регионот“, појасни Бектеши.

Целта на оваа мерка, како што рече, е заштита на домашниот пазар и на граѓаните во време на криза.

„Како што и претходно информиравме, сакам уште еднаш да повторам и да им гарантирам на граѓаните дека државните стокови резерви се стабилни. Северна Македонија има доволна количина на залихи од пченица и пченка за покривање на домашните потреби. Приватните млинови/компании во земјата располагаат со преку 50.000 тони залихи од пченица, преку 10.000 тони пченка и над 8.000 тони јачмен, што се должи на растот на домашното производство на пченица од 195 илјади тони во 2017 година, на 253 илјади тони во 2021 година. Доколку се појави потреба, државата е подготвена и за дополнување на стоковните резерви, но за тоа во моментов нема потреба. Граѓаните да не подлегнуваат на никакви шпекулации, да не се грижат“, додаде министерот за економија.