Милиони луѓе низ Европа се изложени на ризик: Зголемените цени на енергијата опасно го намалуваат животниот стандард на граѓаните

Брзиот пораст на цените на гасот, струјата и горивата се повеќе го загрозува животниот стандард на граѓаните, па земјите-членки на ЕУ бараат од Брисел заедничко решение за намалување на трошоците за енергија.

Предложени се повеќе форми на поддршка и за граѓаните и за бизнисите. Грција, на пример, е за ограничување на цените на ниво на Унијата.

Грците се соочуваат со највисоките цени на енергијата во последните четири децении. Дериватите поскапуваат, а цените на струјата и гасот лани поскапеле за повеќе од 70 отсто, пишува РТС.

– Морам секаде да ги скратам трошоците. Навистина не знам како, но морам. Некогаш работам ваму-таму, само за да заработам 40 евра, колку да си го олеснам семејството од трошоци. Тие 40 евра помагаат, вели студентка од Атина, Костандина.

И терапевтот Јорданидис се жали дека се поскапело, од кирија, храна до енергија.

– Се порасна близу 1.200 евра месечно. Тешко е. Во Грција, на пример, 700 до 750 евра се сметаат за висока плата, објаснува Јорданидис.

Грција од минатата година потрошила речиси четири милијарди евра за субвенции за струја и гас за домаќинствата и компаниите. Владата оценува дека товарот на се поскапите енергенси е неодржлив за граѓаните, па затоа бара Брисел брзо да реагира за да се запре натамошниот раст. Мерките што ги преземаат, велат, можат само да ја ублажат моменталната состојба.

– Подготвуваме мерки за најзагрозените, но и за средната класа. Се надеваме дека со дополнителни две милијарди долари ќе им донесеме олеснување на 3,2 милиони ранливи граѓани, но и на домаќинствата кои заработуваат помалку, истакнува грчкиот премиер Киријакос Мицотакис.

Речиси со истите проблеми се соочуваат и другите членки на Унијата. Скапите извори на енергија ги зголемуваат цените и ја туркаат инфлацијата во најсилната европска економија, Германија – така што потрошувачката е слаба. Податоците на германското федерално биро за статистика покажуваат дека цената на гасот е зголемена два и пол пати од 2020 година, а струјата за 150 отсто.