Премиерот Димитар Ковачевски кажа дека Владата деноноќно работи за справување со инфлација која е резултат на скапите енергенси. Во гостувањето на Сител телевизија, тој истакна дека веќе е донесена одлуката за цена на електрична енергија што ќе биде дадена на прехранбената индустрија, со цел цената на прехранбените производи, како брашното и лебот, да биде 10 проценти помала.
-Тие ќе се снабдуваат преку ЕСМ за 80 евра по киловат час. Таа цена ќе стабилна, предвидлива и ќе доведе до намалување на производите, што пак ќедоведе до намалување на инфлацијата во делот на прехранбените производи, рече Ковачевски.
Тој додаде дека државата има механизми за справување со кризата и помага со мерки и кон бизнисот и кон граѓаните.
Тој го повтори апелот за штедење на електрична енергија.
-Време е на штедење, а не на изобилие. Сите средства кои се во буџетот се насочени за најранливите категории на граѓани, рече Ковачевски, повторувајќи дека финансиска помош е предвидена и за пензионерите.
-Покрај помошта, оваа година пензијата ја зголемивме за 10 проценти и со променатата методологија а пресметка за март наредната година ќе има зголемување од дополнителни 6 проценти, што е зголемување за 16% за една година, додаде Ковачевски.
Тој истакна дека средствата се веќе предвидени во новиот буџет.