ПАЃААТ ЦЕНИТЕ НА НАФТАТА: Силниот долар ја намали вредноста на барелот

Цените на нафтата паднаа под 95 долари на меѓународните пазари, откако зголемувањето на каматната стапка во САД го поддржа доларот и повторно ги разгоре стравувањата од глобална рецесија и послаба побарувачка за гориво.

На лондонскиот пазар цената на барелот по пладне беше пониска за 1,39 долари отколку во моментот на вчерашното затворање и изнесуваше 94,77 долари. На американскиот пазар барелот се тргуваше по пониска цена од 1,76 долари, од 88,24 долари.

Силниот долар ја намалува побарувачката за нафта бидејќи ја намалува куповната моќ на купувачите со други валути. Повисоките каматни стапки во САД ги поттикнаа стравувањата од повторно глобална рецесија.

– Сè поизразените стравувања од забавување на растот неминовно ќе се одразат на глобалната побарувачка за нафта – изјави аналитичарот Тамас Варга.

Поголем пад на цените спречија очекувањата за проблеми со снабдувањето во наредните месеци. На почетокот на декември стапува на сила ембаргото на ЕУ за руската нафта поради руската инвазија на Украина, а од февруари ќе биде забранет и увозот на нафтени деривати.

Производството од Организацијата на земјите извознички на нафта (ОПЕК) падна во октомври за прв пат од јуни.

ОПЕК произведе 29,71 милиони барели дневно минатиот месец, покажа истражувањето, што е намалување за 20.000 барели дневно во однос на септември. Производството беше за 1,36 милиони барели помало од проценките на групата.

Почнувајќи од овој месец, ОПЕК и неговите сојузници, вклучително и Русија, планираат да го намалат производството за два милиони барели дневно во споредба со целното ниво. Посебен извештај на ОПЕК покажа дека цената на барелот вчера пораснала за 31 цент, на 94,74 долари, пишува Индекс.