Светската трговска организација (СТО) ја намали прогнозата за растот на глобалната трговија за оваа година од 4,7 на 2,5 отсто поради војната во Украина и санкциите поврзани со тој конфликт, изјави директорот на СТО, Нгози Оконџо-Ивејла. .
Падот на проекциите е поврзан и со тековните проблеми во глобалниот синџир на снабдување, кој започна пред две години како резултат на пандемијата.
Оконџо-Ивејла изјави дека поради нарушувањето во снабдувањето со храна ќе се зголеми цената на храната, додавајќи дека „стравува дека претстои криза со храна“.
Таа за Би-Би-Си изјави дека Русија и Украина, иако учествуваат со само околу 2,5 отсто во светскиот извоз на стоки, се „многу, многу важни во одредени сектори“.
– На прво место, секако, е грижата за жителите на Украина, кои се раселени и кои немаат доволно храна за јадење – рече таа.
Таа посочи дека глобалната економија „ќе претрпи сериозни последици“ и дека недостигот и влијанието на „ограничувањата на снабдувањето со храна“ особено ќе ги почувствуваат посиромашните земји.
Испораките на многу прехранбени производи, вклучително и пченица и пченка, беа погодени по рускиот напад на Украина. Индустриските организации предупредуваат дека ЕУ се бори со недостиг на сончогледово масло. Украина има 46,9 отсто удел во глобалниот извоз, а Русија 29,9 отсто, според S&P Global, но бидејќи украинските пристаништа се затворени, извозот не е можен.
„Навистина сум загрижен за можен глад, особено во сиромашните земји“, рече Оконџо-Ивеила, наведувајќи ја Африка како поранешен нигериски министер за финансии, при што 35 од 55 земји увезуваат пченица и други житарки од Русија и Украина, а 22 увезуваат ѓубриво.
Според неа, податоците на Африканската банка за развој покажуваат дека цените на храната во многу земји веќе се зголемени за 20 до 50 отсто.