Цената на нафтата расте втора недела по ред

Цените на нафтата на светските берзи пораснаа минатата недела, втора по ред, откако Европската комисија предложи постепен прекин на увозот на руска нафта, а повисоките цени го спречуваат слабеењето на побарувачката поради забавувањето на растот на најголемите светски економии.

Цената на барелот на лондонскиот пазар минатата недела порасна за 4,9 отсто, на 112,39 американски долари, додека на американскиот пазар барелот поскапе за 4,85 отсто, на 109,77 долари.

Растот на цените беше поттикнат минатата недела со предлогот на Европската комисија постепено да се прекине увозот на руска нафта и деривати во ЕУ во следните шест месеци и да се забрани транспортот и осигурувањето на транспортот на руската нафта.

Игнорирајќи ги повиците на западните земји за зголемување на производството, Организацијата на земјите извознички на нафта (ОПЕК) и нејзините сојузници, вклучително и Русија, останаа на својот план, кој предвидува само скромно зголемување на производството во јуни, од 432.000 барели дневно. Аналитичарите оценуваат дека реалното зголемување ќе биде далеку помало со оглед на ограничениот капацитет.

„Нема шанса некои членови да ја исполнат таа квота, кога ќе ги земеме предвид предизвиците во производството во Нигерија и другите африкански членки“, рече Џефри Хали од ОАНДА.

Инвеститорите, сепак, очекуваат поголема американска побарувачка оваа есен, откако Вашингтон ги објави плановите за купување 60 милиони барели сурова нафта за стратешки резерви.

Сепак, значителниот пораст на цените ја намали загриженоста за побарувачката поради знаците за слабеење на глобалната економија.

Кинеската економија слабее поради строгите ограничувања во неколку градови, што треба да го запре новиот бран на Ковид-19.

Економијата на САД падна за 0,4 отсто во првиот квартал во однос на претходниот квартал, што е прв економски пад од кратката, но длабока рецесија во средината на кризата со корона пред речиси две години.

И бидејќи американската централна банка (ФЕД) агресивно ги зголеми каматните стапки за 0,5 процентни поени минатата недела и најави дополнително зголемување на каматните стапки за да ја спречи високата инфлација, се очекува растот на најголемиот светски потрошувач на нафта дополнително да забави.

Поради војната во Украина, меѓу другото, се очекува и забавување на закрепнувањето на економијата на еврозоната.

Британската централна банка предупреди во четвртокот дека на Британија и се заканува рецесија и инфлација од повеќе од десет отсто, и покрај тоа што ги зголеми клучните каматни стапки за 0,25 процентни поени, на еден отсто, што е највисоко ниво од 2009 година.

Покрај тоа, вредноста на доларот во однос на кошницата од најважните светски валути достигна највисоко ниво во последните 20 години. А тоа ја прави нафтата поскапа за земјите со други валути, па предизвикува слабеење на побарувачката.

Откако минатата година се зголемија за повеќе од 50 отсто, благодарение на закрепнувањето на светската економија од корона кризата, цените на нафтата скокнаа за околу 45 отсто од почетокот на оваа година.