Австрија и Германија против воведување ембарго на увозот на рускиот гас

Официјална Виена се противи на воведување ембарго за увоз на рускиот гас, а министерот за финансии на Австрија, Магнус Брунер, денеска, пред состанокот на еврогрупата во Луксембург, изјави дека Австрија целосно се согласува со Германија и го отфрла ембаргото за рускиот гас.

Претходно, германскиот министер за економија, Роберт Хабек, се изјасни против итно воведување ембарго за увоз на енергенти од Русија.

„Санкциите се корисни само доколку не го погодат оној што ги воведува“, рече Брунер.

Тој посочи дека е неопходно да се задржи ладна глава, особено во однос на ембаргото за увоз на гас. Брунер рече и дека Австрија, како и Германија, е многу зависна од рускиот гас.

На среден рок, вели тој, целта е да се намали зависноста од рускиот гас, но додава дека е нереално тоа да биде денес или утре. Тој смета дека, наместо тоа, треба да се прошири списокот на лица и организации против кои се воведуваат санкции.

Против ембаргото за увоз на руски гас се изјасни и австрискиот министер за надворешни работи, Александар Шаленберг. Тој рече дека е шокиран од фотографиите од Буча додавајќи дека се неопходни дополнителни санкции против Русија.

„Набрзина работиме на натамошните пакет-санкции, кој ќе биде усвоен оваа недела. Сѐ уште има доволно можности за санкции надвор од ембаргото за гас“, објасни Шаленберг.

Можеби ќе ве интересира...

АДМИНИСТРАЦИЈАТА ПРВА НА УДАР: Една четвртина од работните места во ЕУ може да ги извршува вештачката интелигенција

BiznisPRO

„Голдман Сакс“: Златото е подобра инвестиција од биткоинот

BiznisPRO

Нова ситуација на берзата Binance: Биткоинот скокна за 5 отсто на над 25.000 евра

BiznisPRO