Европската централна банка ќе почне да ги намалува каматните стапки кога ќе биде уверена дека инфлацијата се вратила на целта од 2 отсто, изјави претседателката на ЕЦБ Кристин Лагард за ТВ Франс 2.
– Не можам да прецизирам точен датум кога ќе почнат кратењата, истакна Лагард во интервјуто во четвртокот и додаде дека во наредните месеци ќе има нови, попрецизни податоци и врз основа на нив ќе донесе одлука.
Пазарите се со став дека првото намалување ќе се случи веќе во април, додека креаторите на монетарната политика сигнализираат дека е пореално тоа да се случи кон средината на годината.
Со оглед на тоа што инфлацијата остана под 3 отсто по скокот во декември, официјалните лица на ЕЦБ ги чекаат податоците за зголемувањето на платите што треба да се случи на крајот на првиот квартал.
– Мислам дека го поминавме најголемиот, најтешкиот дел, освен ако не се соочиме со нов голем шок кога се во прашање платите, рече Лагард.
– Платите, во однос на преговорите и колективните договори, се во процес на зголемување и на тој начин што ја надминуваат инфлацијата што ја имаме. Во фаза сме на фаќање, а тоа може да потрае две до три години, заклучи таа.