Илон Маск, новиот сопственик на „Твитер“, им поставил ултиматум на своите вработени во интерна електронска порака да „посветат напорна работа“ или да ја напуштат компанијата, објави Си-ен-ен.
„За да го изградиме револуционерниот ‘Твитер 2.0’ и да успееме во сè поконкурентен свет, ќе мора да бидеме многу посветени“, напиша Маск. „Ова значи дека ќе мора да работите прекувремено и многу интензивно. Само најдобрите ќе можат да останат“, додаде тој.
Маск исто така рече дека „Твитер“ ќе биде „многу поинженерски ориентиран“ и им порача на вработените: „ако сакате да бидете дел од новиот ‘Твитер’, одговорете со ‘да’ на пораката“.
Тој додаде дека вработените кои нема да го сторат тоа до одредено време утре ќе бидат отпуштени и ќе добијат тримесечна отпремнина.
Оваа порака ја насловил „Вилушка на патот“, а ја испратил откако јавно и приватно се судрил со вработените за начинот на кој го води „Твитер“.
Откако го презеде „Твитер“, Маск ги отпушти извршните директори, бордот на директори и речиси половина од вработените.
„Без разлика каква одлука ќе донесете, ви благодариме што напорно работевте за да го направите ‘Твитер’ успешен“, заклучил тој.