Инфлацијата во САД благо порасна во декември, како одраз на стабилизирањето на цените на бензинот по остриот пад претходниот месец, покажаа податоците на Министерството за труд.
Годишната стапка на инфлација во најголемата светска економија во декември изнесува 3,4 отсто, пресмета Министерството. Во ноември цените пораснале за 3,1 отсто.
Без цените на храната и енергијата, стапката на инфлација изнесува 3,9 отсто и е за 0,1 процентен поен пониска во однос на ноември.
Цените на храната пораснале за 2,9 отсто, нешто повеќе од ноември.
Цените на горивата паѓаат
Цените на бензините паднаа за 1,9 отсто, неколку пати поблаго од претходниот месец кога потонаа за 8,9 отсто.
Месечната споредба покажува поскапување на бензините за 0,2 отсто во однос на ноември кога паднале за 0,9 отсто.
Енергенсите на месечно ниво поскапеа за 0,4 отсто, по намалувањето на цената од 2,9 отсто во претходниот месец.
Ова го забрза растот на потрошувачките цени во декември на 0,3 отсто на месечно ниво, од 0,1 отсто во ноември.
Без храна и енергија, цените се зголемени за 0,3 отсто, како и во претходниот месец.
Трошоците за домување, во кои не се вклучени сметките за гас и струја, се зголемени за 0,5 отсто во однос на ноември кога пораснале за 0,4 отсто. На годишно ниво тие пораснале за 6,2 отсто, речиси колку и во ноември.