Во Германија, кризата со недостиг на станови може да се ублажи со пренамена на деловните простории во станови, објави во понеделникот јавната телевизија АРД.
„Во Германија, 20.000 нови станови би можеле да се создадат со пренамена до 2025 година, бидејќи многу канцелариски комплекси остануваат празни без изгледи за повторно издавање“, рече Хелге Шонеман од компанијата за недвижности JLL за АРД.
Тој го посочи примерот на финансиската метропола Франкфурт на Мајна, каде неколку канцелариски облакодери веќе се претворени во станбени згради.
„Во Франкфурт рано почнаа со пренамена бидејќи зградите со станови носат поголем приход од зградите со канцеларии, за кои, за разлика од становите, побарувачката е намалена со години“, вели експертот за недвижности.
Сепак, тој рече дека пренамената на класичните канцеларии, за кои има се помалку потреба од пандемијата на корона вирусот и зголемената работа од дома, нема да може да го реши проблемот со драстичниот недостиг на станови, туку само „ чекор во вистинската насока“.
Според студијата на Институтот Пестел во Хановер, Германија во моментов има недостиг од 700.000 станови, што е најголем недостиг на станови во последните 20 години.
Најголем недостиг има во големите градови, каде недостатокот на станови стана голем проблем за економијата, која сè потешко е да најде сместување за квалификувана работна сила.
Недостигот од станбен простор се поврзува со доаѓањето на голем број бегалци и имигранти за потребите на пазарот на трудот, како и драстичен пад на изградбата на нови станови.
Стагнација во станбениот сектор беше предизвикана од растот на каматните стапки, недостигот на работна сила и растот на цените на градежните материјали.
Друг проблем на германскиот пазар на недвижности е драстичното зголемување на кириите, поради што владејачката Социјалдемократска партија на Германија (СПД) најави мерки за ограничување на зголемувањето на закупнината на три години.
Истовремено, закупнината не треба да биде повисока од просечната за одредена станбена површина. Коалициониот партнер на СПД на федерално ниво, Либерално-демократската партија (ФДП), остро се спротивстави на плановите.
„СПД попрво би се концентрирала на тоа како повторно да се создадат градежни импулси за инвестиции во станбени објекти“, рече портпаролот на ФДП за станбена политика, Даниел Фрост, додавајќи дека „доволното домување на пазарот е најдобрата заштита за станарите“.