Добри вести за возачите на почетокот на неделата. Регулаторната комисија за енергетика донесе нова одлука со која горивата поевтинуваат, а најголемо намалување има кај дизелот.
Од 00:01 часот на 6 октомври, ЕУРОДИЗЕЛ БС се продава по максимална цена од 97 денари за литар, што е намалување од дури 3 денари за литар во однос на претходната цена. За возачите кои користат дизел ова значи дека полнењето резервоар од 50 литри сега е за 150 денари поевтино. ERC
Поевтинуваат и бензините. ЕУРОСУПЕР БС-95 се намалува за 1,50 денари и отсега чини 98,50 денари за литар, додека ЕУРОСУПЕР БС-98 исто така поевтинува за 1,50 денари и новата максимална цена е 100,50 денари за литар.
Намалување од 3 денари за литар има и кај Екстра лесното масло за домаќинство, чија нова цена е 108,50 денари за литар. Мазутот поевтинува за 0,285 денари и сега изнесува 49,597 денари за килограм.
Според РКЕ, малопродажните цени на нафтените деривати во просек се намалени за 1,85 проценти во однос на претходната одлука. Намалувањето следува по падот на референтните цени на меѓународниот пазар – кај бензините за 2,885 проценти, а кај дизелот за 4,770 проценти. ERC
Со новата пресметка дизелот повторно се спушта под психолошката граница од 100 денари и сега е поевтин од бензинот БС-95 за 1,50 денари, а од БС-98 за 3,50 денари.
Новите максимални цени се:
ЕУРОСУПЕР БС-95 – 98,50 денари/литар
ЕУРОСУПЕР БС-98 – 100,50 денари/литар
ЕУРОДИЗЕЛ БС – 97,00 денари/литар
Екстра лесно масло – 108,50 денари/литар
Мазут М-1 НС – 49,597 денари/килограм
РКЕ нагласува дека станува збор за највисоки дозволени малопродажни цени, што значи дека трговците можат да ги продаваат горивата и по пониски цени.