Петте најбогати луѓе во светот го удвоија своето богатство од 2020 година, додека 60 отсто од вкупното население, речиси пет милијарди луѓе, станаа уште повеќе осиромашени.
Во последниот извештај на хуманитарната организација Оксфам се наведува дека јазот меѓу богатите и сиромашните веројатно ќе се зголеми, покажува тој. Исто така, се предупредува дека ако продолжат овие трендови, сиромаштијата во светот нема да биде искоренета уште 229 години.
Нагласувајќи го драматичното зголемување на нееднаквоста по пандемијата на корона, Оксфам укажува дека милијардерите во светот се 3,3 милијарди долари побогати отколку во 2020 година, а нивното богатство пораснало три пати побрзо од стапката на инфлација, пишува Гардијан.
Извештајот открива дека седум од 10-те најголеми светски корпорации имаат милијардер како извршен директор или главен акционер, и покрај стагнацијата на животниот стандард на милиони работници ширум светот.
Богатството на петте најбогати луѓе во светот – Илон Маск, Бернард Арно, Џеф Безос, Лери Елисон и Марк Цукерберг се зголеми за 464 милијарди долари или 114 отсто. Во истиот период, вкупното богатство на најсиромашните 4,77 милијарди луѓе, кои сочинуваат 60 отсто од светската популација, реално се намали за 0,2 отсто.
„Луѓето ширум светот работат понапорно и подолго, често за мизерни плати, на несигурни и опасни работни места“, се вели во извештајот.
„Во 52 земји просечната реална заработка на речиси 800 милиони работници падна. Тие работници изгубиле вкупно 1,5 милијарди долари во последните две години, што е еквивалентно на 25 неплатени денови за секој работник“, се додава.
Заедно со богатството на супербогатите, корпоративниот профит порасна и покрај притисокот врз домаќинствата од зголемените животни трошоци. Се проценува дека 148-те најголеми светски корпорации збирно заработиле 1,8 милијарди долари нето добивка во периодот до јуни 2023 година, што е скок од 52 отсто од просечната нето добивка во периодот од 2018 до 2021 година.
Залагајќи се за данок на богатство за да се поправи рамнотежата меѓу работниците и супербогатите работодавци и сопственици на бизниси, во извештајот на Оксфам се вели дека таквиот данок на британските милионери и милијардери може да собере 22 милијарди фунти годишно за буџетот доколку се применува со стапка од 1 до 2 проценти од нето вредноста над 10 милиони фунти.