Годишната стапка на инфлација во Шведска во јануари се зголеми на 5,4 отсто од декемвриските 4,4 отсто, објави денеска Шведскиот статистички институт СЦБ.
Пазарите очекуваа помал пораст на инфлацијата, на 5,1 отсто.
Цените на станбените и комуналните услуги во јануари пораснаа за 10,1 отсто на годишно ниво, значително забрзувајќи од декемвриските 3,3 отсто, што се должи на поскапувањето на струјата, месечните надоместоци за станови и хипотекарните трошоци за станбени згради.
Наспроти тоа, цените на храната и на безалкохолните пијалоци пораснаа со побавно темпо, за 3,8 отсто на годишно ниво наспроти декемвриските 5,3 отсто, како и цените на транспортот за 0,9 отсто наспроти декемвриските 4,3 отсто.
Цените во категоријата Рекреација и култура се зголемени за 4,5 отсто на годишно ниво, во образование за 3,2 отсто, а цените на услугите во рестораните и хотелите се зголемени за 4,9 отсто.