Во северна Италија супермаркетите се празни и нема тестенини. Аптеките во Норвешка ги распродадоа таблетите со јод. А во Германија, трговците предупредуваат на хамстеркауфот – „шопинг со хрчаци“ или панично купување, пишува ФТ.
Украина, заедно со југозападна Русија, долго време е позната како „европска житница“ благодарение на богатата темна почва во регионот, која е меѓу најплодните во светот. Регионот сочинува околу 15 отсто од светското производство на пченица и речиси 30 отсто од светскиот извоз, изјави за Франс 24 Себастиен Абис, истражувач во Францускиот институт за меѓународни и стратешки прашања (ИРИС).
– Но, не е само пченицата – рече Абис – двете земји сочинуваат 80 отсто од светското производство на сончогледово масло, а Украина е четврти по големина извозник на пченка во светот.
Како што продолжуваат борбите во Украина, а руската офанзива се интензивира долж брегот на Црното Море, овие важни производители на култури сега се отсечени од светот.
– Ништо повеќе не ги напушта украинските пристаништа – објасни Абис – и невозможно е да се знае што земјата ќе може да произведе и да жнее во наредните месеци.
Конфликтот веќе имаше драматични последици за Украинците „кои се борат да најдат храна среде куршумите“, рече тој.
Но, тоа предизвикува загриженост и за многу земји кои зависат од украинската пченица и се повеќе се загрижени дека наскоро нема да можат да го прехранат својот народ. Египет, Тунис и Алжир веќе почнаа да ги чувствуваат последиците од недостигот на пченица.
– Земјите од Магреб во голема мера зависат од украинската пченица – рече Абис – А оваа година, уште повеќе затоа што претрпеа голема суша што ги зголеми нивните потреби за странски увоз.
Тоа е катастрофално за Египет.