Глобалниот економски раст се предвидува да забави од проценетите 2,7 отсто во 2023 година на 2,4 отсто во 2024 година, се вели во извештајот на ОН за светската економска ситуација и изгледите за 2024 година.
Слабеењето на глобалната трговија, високите трошоци за задолжување, зголемениот јавен долг, постојано ниските инвестиции и растечките геополитички тензии го ставаат на ризик глобалниот раст, се вели во извештајот.
Растот во многу напредни економии, особено во САД, се предвидува да забави во 2024 година со оглед на високите каматни стапки, забавувањето на потрошувачката и послабите пазари на трудот.
Краткорочните изгледи за раст за многу земји во развој, особено во Источна Азија, Западна Азија и Латинска Америка и Карибите, исто така се влошуваат поради заострените финансиски услови, намалувањето на фискалниот простор и слабата надворешна побарувачка.
Економиите со ниски приходи и ранливите економии се соочуваат со зголемени притисоци во платниот биланс и ризици за одржливост на долгот. Економските изгледи за малите островски држави во развој, особено ќе бидат ограничени од големите долгови, високите каматни стапки и растечката ранливост поврзана со климата, се вели во извештајот, според Ксинхуа.