Зголемени кирии, зголемени трошоци за енергија и инфлација: Многумина во Германија во моментов мора да штедат или да заработат дополнителни пари на работни места со скратено работно време. Предбожиќниот период нуди голем број можности за зголемување на месечните примања. Но, каде е највисоката саатница?
Платформата Jobvalley во Германија, која нуди флексибилни работни места за студенти и дипломци, како и претходните години, ги анализирала тековните огласи за работни места во зимските месеци и проценила колкави се платите на сезонските работни места, пишуваат германските медиуми.
Резултат: и покрај слабеењето на економијата, просечната саатница се зголемила за 50 центи во однос на 2022 година, на 14 евра на час, пишува Феникс-магазин.
Просечната саатница е значително зголемена во однос на претходната година, особено во угостителството, логистиката и малопродажбата.
– На многумина итно им е потребна помош за време на божиќните празници, а тоа се одразува и со уште поатрактивна плата – вели извршниот директор на Jobvalley.
Студентите кои работат во ноември и декември можеа да заработат до 18 евра на час.
Во некои работи со скратено работно време – на пример како келнер на божиќни пазари, како продавач на новогодишни елки или Дедо Мраз – можете да заработите повеќе ако се вклучени бакшишот.
Според резултатите од истражувањето, годинава е можно да се заработи повеќе отколку на Божиќ 2022 година.
Касиерите заработуваат во просек по 14,14 евра на час, што е значително зголемување во однос на претходната година во 2022 година кога просечната саатница изнесувала 13,17 евра.
Како помошник за логистика и комисион, можете да очекувате просечна саатница од 14,46 евра. Тоа е исто така значително повеќе од 13,53 евра на час колку што беше минатата година.
Но, за време на Божиќ, оние кои ги снабдуваат луѓето со храна и пијалоци најдобро заработуваат. И покрај тоа што лани хонорарите на Дедо Мраз беа на врвот на хонорарните плати, оваа година беа заменети со шанкери и келнери.
Додека тие заработуваат во просек по 14,50 евра на час, Дедо Мраз заработува во просек само 13,85 евра на час. Продавачите на новогодишни елки се, како и лани, одзади: просечно заработуваат по 13,50 евра на час, пишува N1.