Авиокомпанијата „Луфтханза“ предвидува дека утре ќе бидат откажани до 90 отсто од летовите на германските аеродроми поради повиците за штрајк на копнениот персонал кој бара повисоки плати.
„Поради штрајкот, во моментов претпоставуваме дека 10 до 20 отсто од распоредот на летови на Луфтханза ќе биде достапен на 7 февруари“, објави германската авиокомпанија на својата веб-страница.
Синдикатот Верди упати повик за предупредувачки штрајк како дел од спорот за платата на персоналот кој работи со патниците на аеродромот. На тоа работно место има 25.000 вработени.
Престанокот на работата се надополнува на долгиот список на штрајкови во последниве месеци на различни бизниси во Германија, каде што инфлацијата ја намалува куповната моќ и ги зголемува тензиите меѓу работниците и раководството на компанијата во преговорите за годишните плати.
Синдикатот Верди бара зголемување на платите за 12,5 отсто во период од 12 месеци за вработените во Луфтханза.
24-часовниот штрајк ќе го зафати најголемиот аеродром во Германија, Франкфурт, како и аеродромите во Минхен, Хамбург, Берлин и Дизелдорф.
Луфтханза ги повика патниците да се појават на аеродромот само доколку нивниот лет не биде откажан.