Јапонскиот автомобилски гигант Тојота (Тојота) денеска објави дека ја суспендира испораката на десет модели на возила поради несоодветна сертификација на нивните дизел мотори.
Меѓу тие возила, од кои некои се продаваат во Азија, Европа и на Блискиот Исток, се популарните Hilux pick up, Land Cruiser 300 4×4, Fortuner и LX500d SUV.
Водечкиот светски производител на автомобили беше вмешан во огромен скандал со наместени тестови на неговата подружница Даихатсу, чие производство на возила е суспендирано од декември.
Денеска беше објавено дека за време на тестовите за сертификација, моќноста на три дизел мотори била мерена со софтвер различен од оној што се користи за нивното производство, па вредностите се разликувале.
Тојота уверува дека овие мотори „ги исполнуваат стандардите за изведба“ и затоа нема потреба да не се користат.
Производителот на мотори „Тојота индустри“ сепак денеска одлучи „привремено“ да ги прекине испораките на тие мотори, а „Тојота“ испораките на оние модели опремени со спорни мотори.
Групата вети дека ќе им даде на јапонските власти „детални објаснувања“ за новиот скандал и брзо ќе преземе „соодветни“ мерки.
Новиот скандал не ги спречи акциите на Тојота денеска значително да пораснат на берзата во Токио (+3,14 отсто), но акциите на „Тојота индустри“ паднаа за четири отсто.