Компанијата „Форд“ и Синдикатот на работниците од автомобилската индустрија /УАВ/ постигнаа привремен договор за прекин на штрајкот од претходните речиси шест недели.
Договорот вклучува рекордно зголемување на платите.
Доколку синдикатите го потврдат договорот, тоа ќе биде прво консензуално решение за штрајкот на работниците на „Форд“, „Џенерал моторс“ и на компанијата „Крајслер“, односно нејзината матична компанија „Стелантис“.
Доколку новиот работен договор биде одобрен од работниците на Форд, тој ќе ги постави стандардите за разговори во Џенерал Моторс и Стелантис, објави Би-Би-Си.
Претседателот на Унијата, Шон Фејн, рече дека договорот вклучува зголемување на платата за 25 отсто во однос на четирииполгодишниот договор, со првично зголемување од 11 отсто.
„Најниско платените привремени работници би имале зголемена плата за повеќе од 150 отсто во овој период. Синдикатот исто така доби право на штрајк поради идното затворање на погоните на Форд“, додаде Фајн.
Извршниот директор и претседател на Форд, Џим Фарли, рече дека компанијата е фокусирана на рестартирање на фабриките и повика 20.000 работници да се вратат на работа.
Американскиот претседател Џозеф Бајден го поздрави склучувањето на привремениот договор.